புனித ஜாண் மரிய வியான்னி

 

நற்கருணையின் முன்னால் செலவிடும் நேரத்தைப் பொன்னான நேரமாகக் கருதவேண்டும் என்றுகூறி அவ்வாறே வாழ்ந்தவர். இறைமக்களுக்கு விண்ணகம் செல்ல பாதை காட்டியவர்.  நான் குருவானால் கடவுளுக்காக ஏராளமான ஆன்மாக்களை வென்றெடுப்பேன் என்ற கூறியவர். பங்கு குருக்களின் முன்மாதிரியாக வாழ்ந்தவரே புனித ஜாண் மரிய வியான்னி. இவர் பிரான்ஸ் நாட்டில் இலயன்ஸ் நகரில் டார்டிலி என்ற கிராமத்தில் 1786ஆம் ஆண்டு மே திங்கள் 8ஆம் நாள் பிறந்தார். தமது 13ஆம் வயதில் நற்கருணை பெற்றுக்கொண்டார். குருவாகப் பணிசெய்ய விரும்பினார். இறையியல் படிப்பையும் இலயன்ஸ் நகரில் முடித்தார். 1815ஆம் ஆண்டு ஆகஸ்ட் 13ஆம் நாள் ஜாண் மரிய வியான்னி குருவாக அருள்பொழிவு பெற்றார். 

    ஜாண் மரிய வியான்னி ஆர்ஸ் என்ற சிற்றூரின் பங்குத் தந்தையாக நியமிக்கப்பட்டார். ஆர்ஸ் கிராமம் செல்ல வழி தெரியாமல் திகைத்தபோது ஆடு மேய்க்கும் சிறுவன் ஒருவன் வழிகாட்டினான். தனக்கு வழிகாட்டிய சிறுவனிடம், ஜாண் மரிய வியான்னி, “நீ எனக்கு ஆர்சுக்கு வழிகாட்டினாய். நான் உனக்கு விண்ணகத்திற்கு வழிகாட்டுவேன்” என்றார். வீடு வீடாய் சென்று மக்களைச் சந்தித்தார். காலையில் முதல் மாலைவரை ஆலயத்தில் செபித்தார். நோயாளிகளையும் அவர்களது இல்லங்களையும் தவறாமல் சந்தித்தனார். பங்கின் பாதுகாவலர் விழாவைச் சிறப்பாக கொண்டாடினார். ஆதரவற்றோரைப் பராமரிக்க இறைபராமரிப்பு இல்லம் தொடங்கி கவனித்தார். குழந்தைகளுக்கு கல்வி புகட்டினார். தனது மறையுரையில் ‘விண்ணகம்’ என்ற சொல்லை அதிகம் பயன்படுத்தினார். 

  பிறரைப் புனிதப்படுத்த தன்னை புனிதப்படுத்தினார். மரிய வியான்னியின் செப, தவ முயற்சியின் பலனாக ஆர்ஸ் சிற்றூர் மறைமாவட்டத்திலேயே ஒரு முன்மாதிரியான பங்குதளமாக 1835இல் அறிவிக்கப்பட்டது. ஒரு நாளைக்கு நான்கு மணி நேரம் மட்டுமே உறங்கினார். கரடு முரடான படுக்கையில் படுத்து உறங்கினார். உணவிற்காக ஒரு சில வேகவைத்த உருளைக் கிழங்குகளை உண்டார். அலகையின் துன்புறுத்தல்களுக்கு ஆளானார். 1859, ஜøலை 29ஆம் நாள் தனது அன்றாட அலுவலான போதிக்கும் பணி மற்றும் ஒப்புரவு அருட்சாதனம் வழங்கும் பணியை முடித்து படுக்கைக்கு திரும்பினார். இறையன்பராக, ஏழ்மையின் இலக்கணமாக வாழ்ந்த ஜாண் மரிய வியான்னி 1859ஆம் ஆண்டு ஆகஸ்ட் 4ஆம் நாள் இயற்கை எய்தினார். 

புனித வால்தியோஃப்

 புனித வால்தியோஃப் 1095ஆம் ஆண்டு பிறந்தார். பெற்றோரின் அன்பில் வளர்ந்து பக்தியுடன் ஆலயம் சென்று செபித்தார். அரண்மனையில் வாழ்ந்தாலும் ஆடம்பரமின்றி எளியவராக வாழ்ந்தார். தூயவரான ஆல்ரெட் என்பவரை பின்பற்றி 1130ஆம் ஆண்டு அகுஸ்தினார் துறவு மடத்தில் சேர்ந்து செபம், தவம், ஒறுத்தல்கள் செய்தார். 

    தன்னலமற்ற தலைவராகவும் அன்பின் சேவகராகவும் பணிவுடன் அனைவருக்கும் பணிவிடை செய்தார். ஆயர் பதவி தன்னை தேடிவந்தபோது தாழ்ச்சியுடன் நான் தகுதியற்றவன் என்று கூறினார். இறையன்பும், கனிவும், இரக்கமும் தனதாக்கி எல்லாருக்கும் இறைபிரசன்னத்தை பகிர்ந்து அனைவரின் நன்மதிப்பையும் மரியாதையும் பெற்றார். மக்களின் ஆன்ம ஈடேற்றத்திற்கு ஆயராது உழைத்த வால்தியோஃப் 1160ஆம் ஆண்டு ஆகஸ்ட் 3ஆம் நாள் இறந்தார்.                                                                        

புனித லொயோலா இஞ்ஞாசியார்

   புனித இஞ்ஞாசியார் ஸ்பெயினில் 1491இல் டிசம்பர் 27ஆம் நாள் பிறந்தார். 15ஆம் வயதில் ஸ்பெயின் நாட்டு அரசவையில் போர் வீரரானார். 1521இல் பம்பலூனா கோட்டையைப் பிரெஞ்சுகாரரிடமிருந்து காப்பாற்றும் போரில் அவரது கால்கள் ஊனமுற்றன. ஓய்வு எடுத்தபோது விவிலியம், புனித பிரான்சிஸ் அசிசியார், புனித சாமிநாதார் சரிதை படித்து மனந்திரும்பினார். 

    1522இல் மார்ச் 25ஆம் நாள் அன்னை மரியா வழி இயேசுவுக்கு தன்னை அர்ப்பணித்தார். குருவாக அருள் பெற்று படித்தோருக்கும், பாமரருக்கும் நற்செய்தி போதித்தார். தவறிய பெண்களுக்கு வழிகாட்டி, நோயுற்றோரை நலமாக்கினார். ஒருநாள் 7 மணிநேரம் இறைவனோடிருந்தார். 1534இல் இறை இயேசுவின் சேவகர்கள் சபை தொடங்கினார். இதயத்தில் இயேசுவை சுமந்து அயலானின் மீட்புக்காகவும், இறைவனின் அதி உன்னத மகிமைக்காகவும் இறையாட்சி பணி செய்து 1556, ஜூலை 31ஆம் நாள் இறந்தார்.     

புனிதர்களான எலியாஸ், ஃபிளேவியன்

    புனிதர்களான எலியாஸ் மற்றும் ஃபிளேவியன் வீசுவாத்தின் வீரரார்கள். எலியாஸ் அரபு நாட்டில் பிறந்து துறவு மடத்தில் கல்வி கற்று விசுவாசத்தில் வளர்ந்தார். 457ஆம் ஆண்டு பாலஸ்தீனாவிற்கு சென்று யுத்திமுஸ் என்பவரின் உதவியில் வாழ்ந்தார். ஜெரிக்கோ என்ற குழுமத்தை நிறுவினார். குருத்துவம் வழி இறைவனின் திருவுளம் நிறைவேற்றினார். 494இல் எருசலேம் மறைத்தந்தையானார். அந்தியோக்கு மறைத்தந்தை ஃபிளேவியன் என்பவருடன் தோழமை உறவு கொண்டிருந்தார். இரண்டு மறைத்தந்தையர்களும் ஓரியல்பு கோட்பாடு எதிராக குரல் கொடுத்தனர். பேரரசர் முதலாம் அனஸ்தாசியுஸ் ஓரியல்பு கோட்பாட்டை ஆதரித்தார். பேரரசர், எலியாஸ் மற்றும் ஃபிளேவியன் இருவரையும் ஓரியல்பு கோட்பாட்டை ஏற்றுக்கொள்வதாகக்கூறி ஆவணத்தில் கையொப்பம் போட சொன்னார். மறுத்த எலியாஸ், ஃபிளேவியன் இருவரையும் 516ஆம் ஆண்டு அய்லா என்ற இடத்திற்கு நாடுகடத்தினார். செல்லும் வழியில் ஃபிளேவியன் இறந்தார். அய்லாவில் எலியாஸ் இறந்தார்.                                                         

🔹ஜூலை -18🔹 புனித ஃபிரட்ரிக்

புனித ஃபிரட்ரிக் 780இல் ஃபிரிஸ்லாந்தில் பிறந்தார். இறையன்பில் வளர்ந்து திருநூல் படிப்பின்மீது ஆர்வம் கொண்டு உட்ரெக்ட் நகருக்கு சென்றார். ஆயர் ரிக்ஃபிரிட் கரங்களால் குருவானார். வால்செரன் பகுதியில் கிறிஸ்துவை அறியாத மக்களுக்கு கிறிஸ்துவின் விழுமியங்களையும் நலம்தரும் நற்செய்தியையும் போதித்தார். சமூகத்தில் நிலவிய தவறுகளையும் ஒழுக்கமற்றவர்களின் வாழ்வையும் சுட்டிகாட்டினார். இதனால் மக்களின் எதிர்ப்பை சந்தித்தார். 

   ஃபிரட்ரிக் 816ஆம் ஆண்டு உட்ரெக்ட் மறைமாவட்ட ஆயரானார். 829இல் மைன்ஸில் நடந்த ஆயர் மன்றத்தில் கலந்துக்கொண்டு இறைஞானம் மிகுந்த வார்த்தைகளை பேசினார். இவரது பணிகளை விரும்பாதோர் இவர்மீது பொய்குற்றம் சுமத்தியபோது இறையருளால் அமைதி காத்தார். 388, ஜூலை 18ஆம் நாள் திருப்பலி நிறைவேற்றி கடவுளுக்கு நன்றி கூறியபோது எதிரிகள் இரண்டு போர் அவரை வெட்டி கொலை செய்தனர்.                                          

🌷புனித அலெக்சியார்

    புனித அலெக்சியார் உரோமையில் 4ஆம் நூற்றாண்டில் பிறந்தார். வளனார் என்ற மெய்யடியாரிடம் கல்வியும், சாத்திரங்களையும், கலைகளையும் கற்றார். ஏழைகள்மீது தீராத பாசம் கொண்டு தனது செல்வங்களை அனைவருக்கும் வழங்கினார். பக்தியிலும், அறிவிலும் வளர்ந்து விண்ணக வாழ்வில் நாட்டம் கொண்டார். உலகைத் துறந்து கடவுளை தனதாக்கிட மண்ணாசை, பொருளாசை, உடலாசைகளை முற்றிலும் துறந்தார். 

  அலெக்சியார் இறைவா! நான் கற்பு நெறி தவறாமல் தரணியில் வாழ அருள்புரிவீர் என்றார். பெற்றோர் அவருக்கு திருமணம் செய்தனர். அலெக்ஸ் தவம் மேற்கொள்ள வீட்டிலிருந்து யாருக்கும் தெரியாமல் புறப்பட்டார். எடேஸ்ஸôவில் 17ஆண்டுகள் கடுந்தவம் புரிந்து மக்களுக்கு நன்மைகள் செய்தார். அவரது பெயரும், புகழும் நாடெங்கும் பரவியபோது தவம் குலைந்துவிடும் என்று அஞ்சி தனது நாட்டில் யாருக்கும் தெரியாமல் தன் வீட்டில் தங்கி வீரர்களின் துன்புறுத்தலை ஏற்று இறந்தார். பெற்றோர் தனது மகன் அலெக்ஸ் என்று அறிந்ததும் துயருற்று அழுது  நல்லடக்கம் செய்தனர்.                  

புனிதர்கள் ஜஸ்தா மற்றும் ருஃபீனா

    

   ஸ்பெயின் நாட்டில் புனித ஜஸ்தா 268ஆம் ஆண்டும் ருஃபீனா 270ஆம் ஆண்டு செல்வத்தில் ஏழைகளானாலும் இறையன்பின் செல்வந்தர்களாக பிறந்தனர். கிறிஸ்தவ விழுமியங்களுக்கு நற்சான்று நல்கி அனைவருக்கும் உதவினர். மண்பாத்திரம் தொழில் செய்தனர். வேற்றினத்து தெய்வத்தை வழிபட்டவர்கள் தங்கள் தெய்வத்திற்கு வழிபாடு செய்ய மண்பாத்திரம் கேட்டபோது ஜஸ்தா, ருஃபீனா இரண்டு சகோதரிகளும் மறுத்தனர். வேற்றினத்தார் இவரது மண்பாத்திரங்களை உடைத்து வீட்டிற்கு தீவைத்து துன்புறுத்தினர். 

இறுதியில் ஜஸ்தா மற்றும் ருஃபீனா ஆளுநன் டயோஜெனியனுஸ் முன் நிறுத்தி கிறிஸ்துவை மறுதலிக்க இரும்பு கம்பியால் அடித்தனர். கிறிஸ்துவின் மீதுள்ள நம்பிக்கையில் உறுதியுடன் இருந்ததால் சிறையில் அடைத்து உணவின்றி துன்புறுத்தினர். ஜஸ்தா கிறிஸ்துவின் பொருட்டு உணவின்றி இறந்தபோது அவரது உடலை கிணற்றில் வீசினர். ருஃபீனாவை தலைவெட்டி கொலை செய்தனர்.                                                                                                                                                    

புனித மேரி மேடலின் போஸ்டல்

   

   புனித மேரி மேடலின் போஸ்டல் பிரான்ஸில் 1756, நவம்பர் 28ஆம் நாள் பிறந்தார். ஆசிர்வாதப்பர் துறவு இல்லத்தில் கல்வி கற்றார். இயேசுவின்மீது அன்பு கொண்டு கற்பு வார்த்தைப்பாடு எடுத்து இடைவிடாமல் இறைபிரசன்னத்தில் வாழ்ந்தார். பிரெஞ்சு புரட்சி காலத்தில் தனது வீட்டில் திருப்பலி நடத்த ஏற்பாடு செய்தார். தனது வீட்டில் நற்கருணை வைத்திருக்கவும், இறக்கும் நிலையில் இருக்கிறவர்களுக்கு நோயில் பூசுதல், நற்கருணை வழங்கவும் அனுமதி பெற்றார். 

  புனித மேரி மேடலின் போஸ்டல்  கடவுள் எப்போதும் தம்முடன் இருக்கிறார் என்பதை உணர்ந்து அச்சமின்றி நற்செயல்கள் செய்தார். சிறியவர், இளைஞர், முதியோர் அனைவரும் விசுவாசத்தில் உறுதியுடன் வாழ அயராது உழைத்தார். 1805இல் இரக்கமிகு சகோதரிகள் சபையை ஆரம்பித்து தனது இறைபணியை விரிவுப்படுத்தினார். கல்வி நிறுவனங்கள் வழி நம்பிக்கையை பகிர்ந்தளித்தார். போராட்டங்கள், அச்சுறுத்தல்கள் மத்தியில் துணிவுடன் இறைபணி செய்த போஸ்டல் 1846ஆம் ஆண்டு ஜூலை 16ஆம் நாள் இறந்தார்.                                                 

புனித பொனவெந்தூர்

 

புனித பொனவெந்தூர் இத்தாலியில் 1218ஆம் ஆண்டு பிறந்தார். குழந்தைப்பருவத்தில் நோயால் பாதித்து இறக்கும் தருவாயில் புனித அசிசியாரிடம் வேண்டல் செய்து நலம் அடைந்ததால் அசிசியாரிடம் பக்தி கொண்டார். முனைவர் பட்டம் பெற்று 1248ஆம் ஆண்டு முதல் பாரிஸ் பல்கலைக்கழகத்தில் ஆசிரியரானார். புனித தாமஸ் அக்குவினாஸ் இவரது நண்பர். 22ஆம் வயதில் புனித பிரான்சிஸ் துறவு சபையில் சேர்ந்தார். தாழ்ச்சியின் வழியில் பயணித்து தூயவரானார். 

        பொனவெந்தூர் 1257இல் சபை தலைவரானார். கடின உழைப்பு, ஒறுத்தல் வழி சபையில் அமைதி ஏற்படுத்தினார். ஏழ்மையும், தாழ்ச்சியும் பின்பற்றி அன்புடன் நோயளிகளை நலமாக்கினார். தியானம், செபம், தவம், நற்கருணை ஆராதனைக்காக நேரங்களை செலவிட்டார். மூவேளை செபம் மாலை 6 மணிக்கு செய்வதை நடைமுறைப்படுத்தினார். சனிக்கிழமை அன்னை மரியாவுக்கு திருப்பலி ஒப்புக்கொடுத்தார். 1273இல் கர்தினால் ஆனார். 1274இல் கிறிஸ்தவ ஒன்றிப்பு சங்கத்தில் பங்கேற்றபோது ஜூலை15ஆம் நாள் இறந்தார்.     

புனித கமில்லஸ் தே லெல்லிஸ்

 

   புனித கமில்லஸ் தே லெல்லிஸ் இத்தாலியில் 1550இல் பிறந்தார். இறைபக்தியில் வளர்ந்து முன்மதியோடு செயல்பட்டார். இளமையில் நெப்போலியன் போர்படையில் படைவீரரானார். படை முகாமில் சூதாட்டத்திற்கு அடிமையானார். போரின்போது 2 கால்களிலும் காயங்கள் ஏற்பட்டதால் போர்களத்திலிருந்து வெளியேறி உரோமையில் மருத்துவமனையில் பணியாற்றினார். 

    உழைப்பும் திறமையும் மிகுந்த கமில்லஸ் கப்புச்சன் சபை பொதுநிலை சகோதரர் பிரிவில் சேர்ந்தார். புனித பிலிப்பு நேரியின் வழிகாட்டுதல் பெற்று புனிதப்பாதையில் பயணித்தார். தனது 32ஆம் வயதில் இயேசு சபை கல்லூரியில் இலத்தின் பயின்று குருவானார். 1584ஆம் ஆண்டு நல்மரணத்தின் தந்தையர்கள் என்ற சபையை தோற்றுவித்து பிளேக் நோய் பாதிக்கப்பட்வர்களுக்கு பணி செய்தார். நோயளிகள்மீது கருசனை கொண்டு இறைவல்லமையால் புதுமைகள் செய்தார். துன்பங்களில் மரியாவிடம் சரண் அடைந்தார். சபையின் தலைவராக நற்செய்தி அறிவித்த கமில்லஸ் 1614, ஜøலை 14ஆம் நாள் இறந்தார்.                                

இயேசுவின் புனித தெரசாள் லாஸ் ஆன்டஸ்

    புனித தெரசாள் லாஸ் ஆன்டஸ் அமெரிக்காவில் 1900, ஜூலை13ஆம் நாள் பிறந்தார். பக்தியில் வளர்ந்து திருப்பலி வழி நற்கருணை ஆண்டவரை சொந்தமாக்கினார். அன்னை மரியாவை பாதுகாவலியாகவும், வழிகாட்டியாகவும், ஆசிரியையாகவும் தேர்ந்தெடுத்தார். நற்கருணை பெற்றநாள், “இயேசு கிறிஸ்துவின் அன்பு வலையில் நான் சிக்கிக்கொண்டேன்” என்றார். குழந்தை ஏசுவின் புனித தெரசாள் சரிதைப் படித்து 1919இல் கார்மெல் துறவு மடத்தில் சேர்ந்தார். 

    தெரசாள் லாஸ் ஆன்டஸ்  இறைபிரசன்னத்தில் நிலைத்திருந்து நோயாளிகள் நலம்பெற இறைவேண்டல் செய்தார். கிறிஸ்துவின் ஏழ்மையில் பங்குபெற ஏழ்மையாக வாழ்ந்தார். செபவாழ்வு, குருக்களுக்கு செபிப்பது, இறைவனை அன்பு செய்வது, இறைவார்த்தையை தியானிப்பது போன்ற விதிகளை பின்பற்றினார். “இறைவனோடு வாழ்வது மண்ணில் விண்ணமன்றோ. பிறருக்கு இரக்கமும், நமக்கு கண்டிப்பும் கொண்டிருப்போம்” என்றுகூறி 1920, ஏப்ரல் 12ஆம் நாள் இறந்தார்.                                                                                                                                          

புனித யோவான் கால்பர்ட்

  புனித யோவான் கால்பர்ட் 999இல் ஃபுளோரன்ஸ் நகரில் பிறந்தார். பெற்றோரின் வாழிகாட்டுதலால் கிறிஸ்துவ விசுவாசத்திலும், பக்தியிலும் வளர்ந்து இறையன்பையும், ஆசீரையும் சுவைத்தார். தனது சகோதரனை கொலை செய்தவனை கிறிஸ்துவின் பெயரால் மன்னித்தார். தன்னை துன்புறுத்தியவர்களை அன்பு செய்தார். இறைவல்லமையும், அன்பையும் உணர்ந்தபோது புனித ஆசிர்வாதப்பர் சபையில் சேர்ந்து செபம், தவம், ஒறுத்தல்கள் வழி புனிதமடைந்தார். 

   யோவான் கால்பர்ட்  ஆசிர்வாதப்பர் சபை ஒழுங்குகளையே பின்பற்றி வல்லம்ரோசா துறவு மடம் ஆரம்பித்தார். ஏழைகளின் தேவைகளை அக்கறையுடன் நிறைவேற்றினார். தன்னை நாடிவருவோரின் பசியை போக்கிட பொருள் வைப்பு அறையிலுள்ள பொருட்களை செபத்தின் வழியாக பெருக்கினார். நற்கருணை ஆண்டவரை தஞ்சமாகவும், அன்னை மரியாவை துணையாகவும் கொண்டிருந்த யோவான் 1073, ஜூலை 12ஆம் நாள் இறந்தார்.

புனித ஆசீர்வாதப்பர்

         

    புனித ஆசீர்வாதப்பர் 480ஆம் ஆண்டு இத்தாலியில் பிறந்தார். உழைக்கவும், செபிக்கவும், எல்லோருக்கும் முன்மாதிரியானார். தனது அறையில் அன்னை மரியாவின் திருச்சொரூபம் வைத்து தீபம் ஏற்றி செபித்தார். உலக இன்பங்களை துறந்து 20ஆம் வயதில் குகையில் இறைவனை தியானித்து செபம், தவம், கடின ஒறுத்தல்கள் செய்தார். திருச்சிலுவையை தனது வாழ்வின் புகலிடமாகவும், ஆறுதலாகவும், செல்வமாகவும் கொண்டிருந்தார். 

   ஆசீர்வாதப்பர் வாழ்வின் சோதனைகளை செபத்தால் வென்றார். தன்னைத் தேடிவந்த மக்களின் ஆன்மீக வாழ்வுக்கு வழிகாட்டி நோய்களை நலமாக்கினார். வறியவர்களுக்கு பொருளும், உணவும் வழங்கினார். துறவிகளுக்கு தலைமை தாங்கி கடின விதிமுறைகளை வழங்கியதால் ஆசீர்வாதப்பரை தலைவராக ஏற்க மறுத்தனர். ஆசீர்வாதப்பர் குடிக்கும் நீரில் விஷம் கலந்தபோது சிலுவை வரைந்ததும் குவளை உடைந்தது. 547, மார்ச் 21ஆம் நாள் இயேசுவின் உடலையும் இரத்தத்தையும் பருகி இறந்தார்.   

புனித ஃபெலிசித்தா, அவரது ஏழு மகன்கள்

  

        புனித ஃபெலித்தா மற்றும் அவரது ஏழு மகன்களும் உரோமையில் வாழ்ந்தனர். ஃபெலித்தா தான் கிறிஸ்தவர் என்பதில் பெருமை கொண்டு கனிவின் வார்த்தைகளால் அனைவரையும் அன்பு செய்தார். தனது 7 பிள்ளைகளுக்கு இறைவார்த்தையை எடுத்துரைத்து கத்தோலிக்க விசுவாசத்தில் வளர்த்தினார். கிறிஸ்துவை மீட்பராகவும், ஆரசராகவும் ஏற்று கிறிஸ்தவ வாழ்வுக்கு சான்று பகர்ந்த ஃபெலித்தா, அவரது 7 மகன்களும் வேதவிரோதிகள் கைது செய்து சிறையில் அடைத்து கிறிஸ்துவை மறுதலிக்க துன்புறுத்தினர். 

       கிறிஸ்துவின் பொருட்டு துன்பங்களை மகிழ்வுடன் ஏற்ற ஃபெலிசித்தா தனது ஏழு மகன்களிடம், “பிள்ளைகளே! வானத்தை அண்ணார்ந்து பாருங்கள். இயேசு உங்களுக்காகக் காத்துக்கொண்டிருக்கிறார். அவரின் அன்பில் நம்பிக்கையுடன் இருங்கள். உங்கள் ஆன்மாவைக் காத்துக்கொள்ள உறுதியுடன் போராடுங்கள்” என்றார். 165ஆம் ஆண்டு ஃபெலிசித்த அவரது மகன்களை கசையால் அடித்தும், தடியால் அடித்தும், தலைவெட்டியும் கொலை செய்தனர்.   

புனித எஸ்பேரியஸ், ஸோவே

    

   புனிதர்களான எஸ்பேரியஸ் மற்றும் ஸோவே இரண்டாம் நூற்றாண்டில் வாழ்ந்த கிறிஸ்தவ தம்பதிகள். இவர்கள் இரண்டு குழந்தைகளுக்கு பெற்றோர். பம்பிலியாவில் கிறிஸ்துவை அறியாத கட்டுலஸ் என்பவரின் வீட்டில் அடிமைகளாக வேலை செய்தனர். முதலாளி கட்டுலஸ்க்கு மகன் பிறந்ததும் அவர் வழிபடும் தெய்வ சிலைக்கு படையல் கொடுக்க ஏற்பாடு செய்தான். அந்நிகழ்வில் அப்பகுதி மக்கள் அனைவரும் பங்கேற்றனர். 

     எஸ்பேரியஸ் குடும்பம் பங்கேற்கவில்லை. முதலாளி ஸ்பேரியஸ் குடும்பத்தை அழைத்து கோபத்துடன் அவர் வணங்கும் தெய்வ சிலையை வணங்குமாறு சொன்னான். கிறிஸ்துவை அரசராக ஏற்ற ஸ்பேரியஸ், úஸôவே இருவரும் தலைவனின் கட்டளையைப் புறக்கணித்து என்றும் வாழும் கிறிஸ்துவை அரசராக அறிக்கையிட்டனர். கோபம் அடைந்த கட்டுலஸ், எஸ்பேரியஸ் அவரது மனைவி இரண்டு குழந்தைகளையும் கொன்று நெருப்பு சூளைக்கு தூக்கிப்போட்டனர். கிறிஸ்தவ விசுவாசத்திற்கு சான்றாக வாழ்ந்த எஸ்பேரியஸ் அவரது குடும்பமும் 127ஆம் ஆண்டு இறந்தனர்.

புனித பான்றேனஸ்

புனித பான்றேனஸ் இத்தாலியில் பிறந்தார். சாக்ரடீஸ் கொள்கையை பின்பற்றினார். கிறிஸ்தவர்களுடன் தொடர்பு கொண்டு கிறிஸ்துவையும் அவரது கோட்பாடுகளையும் நன்கு கற்றார். புனித மாற்குவின் சீடர்கள் நடத்தி வந்த மறைப்பள்ளியல் படித்து இறையறிவில் வளர்ந்து அப்பள்ளிக்கு தலைவரானர்.      இறைவாக்கினர்கள், திருத்தூதர்களின் போதனையை உள்வாங்கினார். 

      பான்றேனஸ் இறைவனுக்கு தன்னை அர்ப்பணித்து ஞானமும், அறிவுதிறனும் பெற்று தாழ்ச்சியுடன் வாழ்ந்தார். தனது வாழ்வை நெறிப்படுத்தி இறைவனுக்கு உகந்தவரானார். திருத்தூதர்களின் சிந்தனைகளை மக்களுக்கு போதித்தார். அமைதியின் கடவுளை சொந்தமாக்கி அமைதியில் வாழ்ந்தார். தன்னிடம் வந்தவர்களை இறையன்பால் இறைபிரசன்னத்தால் நிறைத்தார். நற்செய்தி இந்தயாவிலும் அறிவித்து எண்ணற்றோரை மனமாற்றினார். கிறிஸ்துவின் பாதத்தடங்களில் நடந்து ஓர் இறைவாக்கினராக இறைபணி செய்த பான்றேனஸ் 216ஆம் ஆண்டு இறந்தார்.                                                                                                         

புனித மரிய கொரற்றி

   

         புனித மரிய கொரற்றி 1890ஆம் ஆண்டு இத்தாலியில் ஏழ்மை, அன்பு, பக்தி மிகுந்த குடும்பத்தில் பிறந்தார்.   அன்னை மரியாவின் அரவணைப்பில் தனது கன்னிமையை இறைவனுக்கு அர்ப்பணித்தார்.  இறைவார்த்தையை தியானித்து இறையன்பின் செல்வந்தரானார். காலையும் மாலையும் செபமும், செபமாலையும் செபித்து தூயவரானார். 12ஆம் வயதில் முதன் முறையாக நற்கருணை பெற்று இயேசுவுடன் உறவாடினார். 

         மரிய கொரற்றியின் குடும்பம் உரோமை சென்று மாசெலெனி பிரபு வீட்டில் வேலை செய்தனர். அதேவீட்டில் தீயப்பழக்கங்களுக்கு அடிமையான அலெக்ஸாண்டரும் இருந்தான். அலெக்ஸாண்டர் மரிய கொரற்றியை பாவம் செய்யத் தூண்டினான். தூயவரான கொரற்றி பாவம் செய்யக்கூடாது என்றார். மரிய கொரற்றி வீட்டில் தனிமையில் இருந்தபோது அலெக்ஸாண்டர் தனது ஆசைக்கு இணங்க வற்புறுத்தினான். மறுத்த மரிய கொரற்றியை தரதரவென்று மாடிக்கு இழுத்து சென்று கத்தியால் 14 முறை குத்தி ஜூலை 6ஆம் நாள் கொலை செய்தான். 

புனித அந்தோனி மரிய சக்கரியா

     

      புனித அந்தோனி மரிய சக்கரியா 1502ஆம் ஆண்டு இத்தாலியில் பிறந்தார். தாயன்பிலும் இறைபக்தியிலும் வளர்ந்து கல்வி கற்றார். ஏழைகளிடத்தில் அன்பும் இரக்கம் கொண்டு உதவினார். தனது 22ஆம் வயதில் மருத்துவரானார். நம்பிக்கையும், இறைபற்றும் மிகுந்த அந்தோனி இறையில் கற்று 1528ஆம் ஆண்டு குருவானார். நோயாளிகளுக்கு மருத்துவம் செய்து ஆறுதல் கூறினார். சிறை கைதிகளுக்கு கிறிஸ்துவின் அன்பை பகர்ந்தார். 

     

        சக்கரியா மிலான் சென்றபோது மக்கள் பிளேக் நோயால் பாதிக்கப்பட்டு துயருற்றவர்களுக்கு உதவினார். மக்களின் ஆடம்பர வாழ்வு, ஏற்றத்தாழ்வுகள், அரசியல் கொள்கைகள், லூத்தர் போதனையால் திருச்சபையில் பிளவுகள் ஏற்பட்ட நிலையை கண்டார். மக்களுக்கு உதவிட சக்கரியா 5 சகோதரர்களுடன் துறவு சபை நிறுவினார். இறைவார்த்தை, திருச்சபையின் விசுவாச உண்மைகளை போதித்தார். மக்கள் திருச்சிலுவை மீது அன்பு கொண்டு சிலுவையில் அடைக்கலம் தேடவும், நற்கருணை ஆராதனை செய்யவும் கற்பித்த சக்கரியா 1039ஆம் ஆண்டு இறந்தார்.

போர்ச்சுக்கல் நாட்டு புனித எலிசபெத்

 

   போர்ச்சுக்கல் நாட்டு புனித எலிசபெத் போர்ச்சுக்கல் நாட்டில் 1271ஆம் ஆண்டு பிறந்தார். எலிசபெத் அரண்மனையில் வாழ்ந்தாலும் ஏழ்மையில் வாழ்ந்தார். ஏழைகளுக்கு உதவி செய்து ஆனந்தம் அடைந்தார். அறநெறி வாழ்விலும் ஒழுக்கத்திலும் இறைபக்தியிலும் இறைவனுக்கு உகந்தவரானார். 12ஆம் வயதில் போர்ச்சுக்கல் நாட்டு இளவரசர் டென்னிஸ் என்பவரை திருமணம் செய்தார். 

    எலிசபெத் அரண்மணை வாசிகளிடம் அன்புடன் பழகினார். கணவரின் துன்புறுத்தலுக்கு உள்ளானபோது இறைவேண்டல் வழி கணவரை மனம்மாற்றினார். இரண்டு குழந்தைகளுக்கு தாயானார். ஏழைகள், நோயாளிகள், தனிமையில் வாடுவோர் அனைவருக்கும் உதவினார். கணவர் இறந்தப்பின் மூன்றாம் பிரான்சிஸ் அசிசியார் சபையில் துறவு மேற்கொண்டு ஏழைகள், நோயுற்றோர் மத்தியில் பணி செய்தார். மக்கள் மனதில் இறையமைதி ஏற்படுத்திய எலிசபெத் 1336ஆம் ஆண்டு ஜூலை திங்கள் 4ஆம் நாள் இறந்தார். 

புனித தோமையார்

 

 புனித தோமையார் கலிலேயாவில் ஏழை மீனவப் பெற்றோருக்கு பிறந்தார். 12 திருத்தூதர்களுள் ஒருவர். கிறிஸ்துவின்மீது பற்றுகொண்டு வாழ்ந்தார். உலகெங்கும் சென்று படைப்பிற்கெல்லாம் நற்செய்தியை பறைசாற்றுங்கள் என்றுகூறிய கிறிஸ்துவின் வார்த்தையை அறிவிக்க இந்தியா வந்தார். தச்சு தொழில் செய்பவராக தட்சசீலம் என்ற இடத்தில் தனது போதனையை ஆரம்பித்தார். அரசர் அரண்மனை கட்டித்தருமாறுப் பணம் தோமாவிடம் கொடுத்தார்.                                                                                                                                                        

    தோமையார் அரசனிடமிருந்து பெற்ற பணத்தை ஏழைகளுக்கு உதவினார். இதனால் அரசன் தோமாவை சிறையில் அடைத்தான். அரசனின் சகோதரன் காத் நோயினால் பாதிக்கப்பட்டு இறந்து தனது அண்ணன் கனகவில் தோன்றி, விண்ணகத்தில் தோமா கட்டியுள்ள அரண்மனையில் நான் நலமோடு இருக்கிறேன். அவரை ஒன்றும் செய்துவிடாதே என்றார். அரசன் மனம் மாறினான். 52ஆம் ஆண்டு கேரளா வந்தார். அரசன் மாஸ்டாய் என்பவரின் மனைவி மக்கள் மற்றும் ஏராளானோர் கிறிஸ்துவை ஏற்றுக்கொண்டதால் தோமாவைப் பெரியமலை பகுதியில் ஈட்டியால் குத்தி கொலை செய்தார்கள்.

புனிதர்கள் ப்ரோசெசு மற்றும் மார்டினியன்

 

   நீரோவின் மறைக்கலகத்தின் போது திருத்தூதர்களான பேதுரு மற்றும் பவுல் இருவரும் கைது செய்து சிறையில் அடைத்தனர். சிறை காவலர்களிடம் கிறிஸ்துவை எடுத்துரைத்தனர். காவலர்கள் புனித ப்ரோசெசு மற்றும் மார்டினியன் திருத்தூதர்களின் போதனையால் ஈர்க்கப்பட்டு மனம்மாறி திருமுழுக்கு பெற்று கிறிஸ்துவின் விழுமியங்களுக்கு சான்று பகர்ந்தனர். 

        இயேசுவின் திருவுடல், திருஇரத்தம் பருகினர். திருத்தூதர்கள் அறிவித்த  செய்தியை கிறிஸ்தவர்களுக்கு அறிவித்தனர். இதையறிந்த சிறை அதிகாரி ப்ரோசெசு, மார்டினியன் இருவரையும் அழைத்து உரோமை தெய்வமான ஜøபிடருக்கு தூபம் காட்டுமாறு கூறினார். காவலர்கள் இயேசுவின் திருநாமம் போற்றப்படுவதாக என்று புகழ்ந்தனர். இதனால் ப்ரோசெசு மற்றும் மார்டினியன் இருவருக்கும் மரணதண்டனை விதித்தனர். கிறிஸ்துவை அரசராகவும் மீட்பராகவும் ஏற்றுக்கொண்டதால் ப்ரோசெசு, மார்டினியன் இருவரின் தலை வெட்டப்பட்டு மறைசாட்சியானார்கள். 

புனித கால்

 

    புனித கால் 489இல் சமூகத்தில் மதிப்பும், மரியாதையும் பெற்ற குடும்பத்தில் பிறந்தார். பெற்றோர் திருமண ஏற்பாடு செய்தபோது யாருக்கும் தெரியாமல் வீட்டிலிருந்து புறப்பட்டு கோர்னோனில் துறவு இல்லம் சென்றார். துறவு இல்லத்தின் தலைவர் பெற்றோரின் அனுமதி பெற்று வரக்கூறினார். இறைதஞ்சமுடன் வீட்டிற்கு வந்து தனது விருப்பம் தந்தையிடம் கூறினார். தந்தை இறை திருவுளம் அறிந்து கால் துறவு மேற்கொள்ள அனுமதியும் ஆசிரும் அளித்தார். 

    அன்னை மரியாவிடம் பக்தி கொண்டு இறையாட்சி பணி செய்ய குருவானார். ஆயரின் ஆலோசகராக நியமனம் பெற்றார். அன்பின் கனிவின் வார்த்தைகளால் தீயோரை நல்வழிப்படுத்தினார். அறிவிலும் திறமையிலும் வளர்ந்து இறைவார்த்தை வாழ்வாக்கி போதித்தார். ஆஸ்ட்ரேசியாவில் நற்செய்தி அறிவித்தபோது கைது செய்து சிறையில் அடைக்கப்பட்டார். சிறை துன்பங்களை மகிழ்வுடன் ஏற்று விடுதலையானார். 527ஆம் க்ளேர்மோன்ட் மறைமாவட்டத்தின் ஆயரானார். தீயவர்களை மனமாற்றி கால் 553ஆம் ஆண்டு இறந்தார்.

புனித பேதுரு மற்றும் புனித பவுல்

     

         திருச்சபையின் இரண்டு தூண்கள் புனித பேதுரு மற்றும் புனித பவுல். இயேசு கிறிஸ்துவினால் ஆட்கொள்ளப்பட்டவர்கள். பேதுரு பெத்சாய்தா நகரில் பிறந்து கப்பர்நகூமில் குடியேறிய யோனாவின் மகன். பெந்தகோஸ்தே நாளில் தூய ஆவியை பெற்று போதித்த முதல் போதனையில் 3000 பேர் திருமுழுக்குப் பெற்றனர். பாலஸ்தீனாவில் பணியாற்றினார். முடவனுக்கு இயேசுவின் பெயரால் குணம் கொடுத்தார். 67இல் சிலுவையில் அறைந்து கொல்லப்பட்டார்.     

      புனித பவுல் தர்சு நகரில் பிறந்தார். யூத ரபி கமாலியேல் என்பவரிடத்தில் திருச்சட்டத்தில் பயிற்சி பெற்றார். கிறிஸ்தவர்களை துன்புறுத்தினார். இறைவனின் அழைப்பு பெற்று சவுல்þபவுலாக மாறி நற்செய்தி பணிக்காக தன்னை அர்ப்பணித்தார். கிறிஸ்துவைப் பற்றி கேள்விப்படாத இடங்களில் நற்செய்தி  அறிவித்தார். தன் சொல்லாலும், செயலாலும் கிறிஸ்துவின் உண்மையான ஊழியனாக வாழ்ந்த பவுல் 67ஆம் ஆண்டு நீரோ மன்னனின் காலத்தில் தலை வெட்டிக் கொலை செய்யப்பட்டார். 

உரோமைத் திருச்சபையின் முதல் மறைசாட்சிகள்

           

       உரோமைத் திருச்சபையின் முதல் மறைசாட்சிகள். கத்தோலிக்கத் திருச்சபை மறைசாட்சிகளின் இரத்தத்தால் கட்டப்பட்டது. கி.பி முதல் நூற்றாண்டு முதல் நான்காம் நூற்றாண்டு தொடக்கம் வரை இயேசு கிறிஸ்துவை ஆண்டவராக ஏற்றுக்கொண்ட கிறிஸ்தவர்களை சிலுவையில் அறைதல், தலைவெட்டுதல், நெருப்பில் எரித்தல், குளிர்ந்த நீரில் உரையவைத்தல், விலங்குகளுக்கு இரையாக்குதல், உயிரோடு தோல் உறித்தல் போன்ற பல்வேறு முறையில் கிறிஸ்தவர்கள் மறைசாட்சியாக இறந்தனர்.

         64ஆம் ஆண்டு பேரரசர் நீரோ தனது அரண்மனையை விரிவுப்படுத்த உரோமையில் தீ வைத்தார். மக்கள் கோபம் கொண்டு கொதித்தனர். மக்கள் தனக்கு எதிராக பிரச்சனை எழுப்புவதை அறிந்த பேரரசன்  கிறிஸ்தவர்கள் தான் உரோமை நகருக்கு தீ வைத்தார்கள் என்றுகூறி மக்களை நம்பவைத்தார். மக்களின் கோபம் முழுவதும் கிறிஸ்தவர்கள்மீது திரும்பியது. குற்றமற்ற கிறிஸ்தவர்கள் விலங்குகளுக்கும், தீக்கும் இரையானார்கள்.                    

புனித ஐரனியஸ்

 

      புனித ஐரனியஸ் இரண்டாம் நூற்றாண்டின் முதல் பாதியில் பிறந்தார். கத்தோலிக்க இறையியலார்களின் தந்தை என்றழைக்கப்படுகிறார். உரோமைப் பேரரசரான மால்குஸ் அவுரேலியுஸ் கிறிஸ்தவர்களை கொலை செய்த காலத்தில் லுக்குனம் பகுதியில் குருவாக பணி செய்தார். மறைக்கலகத்தின் போது கிறிஸ்தவ நம்பிக்கையை புறக்கணிக்காத அருள்பணியாளர்கள் சிறையில் அடைக்கப்பட்ட குருக்களின் நிலையை உரோமை சென்று திருத்தந்தையிடம் எடுத்துரைத்தார்.  

     ஐரனியஸ்  லுக்குனம் பகுதிக்கு திரும்பியதும் ஆயரானார். 24 ஆண்டுகள் அமைதியுடன் ஆயராக இறைபணி செய்தார். சிந்தனைத்துவக் கருத்துக்கள், தப்பறைகள் ஆகியவற்றிற்கு எதிராக நூல்கள் எழுதினார். புதிய ஏற்பாட்டின் அதிகாரப்பூர்வ பதிப்புகள் உருவாக வழி செய்த ஐரனியஸ் மறைசாட்சியாக இறந்தார்.        

அலெக்ஸாந்திரியா நகர் புனித சிரில்

        அலெக்ஸாந்திரியா நகர் புனித சிரில் 376ஆம் ஆண்டு எகிப்தில் பிறந்தார். இறைபக்தியில் வளர்ந்து இறைஞானம் மிகுந்தவரானார். இறையியல் கற்று குருவாக அருள்பொழிவு பெற்றார். இறைவனோடு இணைந்து திருச்சபையை அன்பு செய்தார். தியோஃபிலஸ் 412இல் இறந்தபோது சிரில் மறைத்தந்தையானார். நெஸ்தோரியனிசம் தப்பறைக்கு எதிராக குரல் கொடுத்தார். 

   கிறிஸ்தவர்களை துன்பங்களிலிருந்து விடுவித்தார். தன்மீது குற்றம் சுமத்தியவர்களை மன்னித்து அன்பு செய்தார். அன்னை மரியாவிடம் மிகுந்த அன்பும் பக்தியும் பற்றும் கொண்டார். “வெவ்வேறான மெழுகுத் துண்டுகள் இரண்டை எடுத்து ஒட்ட வைக்கும்போது ஒன்றாகி விடுகிறதன்றோ? அவ்வாறே நற்கருணை விருந்தில் பங்கேற்கும் ஒருவர் கிறிஸ்துவுடன் ஒன்றாகிறார். கிறிஸ்து அவருடனும், அவர் கிறிஸ்துவடனும் இணைந்து விடுகின்றார்” என்றுகூறிய சிரில் 444, ஜூன் 27ஆம் நாள் இறந்தார்.

புனித ஜோஸ் மரியா எஸ்க்ரிவா தே பாலக்கர்

 

   

    புனித ஜோஸ் மரியா எஸ்க்ரிவா தே பாலக்கர் ஸ்பெயினில் 1902இல் ஜனவரி 9ஆம் நாள் பிறந்தார். கத்தோலிக்கப் பள்ளியில் பயின்று பக்தியில் வளர்ந்தார். சட்டம் பயின்று 1925ஆம் ஆண்டு குருவானார். மேய்ப்புப் பணியில் அதிதீவிரம் காட்டினார். ஏழைகள், குழந்தைகள், நோயாளிகளுக்கு உதவினார். உழைப்பின் மேன்மையை உணர்ந்து கடினமாக உழைத்தார். இறைவார்த்தையை தியானித்து இறையன்பை சுவைத்தார். 

   

 சமூகத்திற்கும் திருச்சபைக்கும் தனது வாழ்வை அர்ப்பணித்தார். இறைமக்கள் தூய்மையை பின்பற்ற வழிகாட்டினார். இறைப்பணி என்ற அமைப்பை உருவாக்கி இறையன்பு, சகோதர அன்பை எடுத்துரைத்தார். எதிர்ப்புகளை சந்தித்தபோது இறைவனின் துணைநாடி முன்னேறினார். தொழிற் பள்ளிகள், விவசாய பயிற்சிகள், பல்கலைக்கழகங்கள், பள்ளிக்கூடங்கள், மருத்துவமனைகள் போன்றவற்றைத் தொடங்கி கிறிஸ்தவ விழுமியங்களுக்கு சான்றாக பணி செய்த மரியா 1975, ஜøன் 26ஆம் நாள் இறந்தார். 

புனித வில்லியம்

 

    மோன்ட்ரே விர்ஜினே நகர் புனித வில்லியம் இத்தாலியில் 1085ஆம் ஆண்டு பிறந்தார். குழந்தைப் பருவத்தில் பெற்றோரை இழந்தார். தனது 15ஆம் வயதில் உலக இன்பங்களை துறந்து ஒறுத்தல்கள் செய்தார். கால்நடையாக புனித யாக்கோபின் திருத்தலத்திற்கு திருப்பயணம் மேற்கொண்டார். இறை தூண்டுதலால் இத்தாலியில் இறைபணி செய்ய இறைவல்லமையால் உந்துதல் பெற்றார். 

         

      விர்ஜினே பகுதியில் குடிசை அமைத்து தனிமையில் தன் ஆன்மீக வாழ்வை ஆரம்பித்தார். இறையனுபவம் மிகுந்த வில்லியம் அவர்களை மக்கள் சந்தித்து இறையன்பு,இறையாசீர், இறையமைதியை பெற்றனர். ஏழைகளின் நலன் கருதி நன்மைகள், புதுமைகள் செய்தார். பலரை தன்னுடன் இணைத்து துறவு மேற்கொண்டார். கடினமான தவ ஒறுத்தல்கள், இறைவேண்டல் வழியாக ஆன்மாக்கள் மீட்பு பெற அயராது உழைத்தார். சிசிலியில் முதலாம் ரோஜரின் உதவியுடன் ஆண்கள், பெண்கள் என்று துறவு இல்லங்கள் நிறுவினார். 1142இல் ஜூன் 25ஆம் நாள் இறந்தார். 

புனித திருமுழுக்கு யோவான்

 

    புனித திருமுழுக்கு யோவானின் தந்தை செக்கரியா. தாய் எலிசபெத் முதிர்ந்த வயதில் யோவானை பெற்றெடுத்தார். யோவான் இறைவனின் கைவன்மையைப் பெற்று தனது வாழ்க்கைமுறை, பேச்சு ஆகியவற்றில் தனித்தும் பெற்றிருந்தார். பாலைவனத்தில் ஆண்டவருக்காக வழியை ஆயத்தம் செய்தார். 

            யோர்தான் ஆற்றில் இயேசுவுக்கு திருமுழுக்கு கொடுத்தார். உடல், உணவு ஆகியவற்றில் எலியாவை பின்பற்றி காட்டுத்தேன் உணவாகவும், ஒட்டகத்தோல் ஆடையாகவும் பயன்படுத்தினார். இஸ்ரயேல் அனைவரும் மீட்பு பெறவேண்டும் என்ற செய்தியை எடுத்துரைத்தார். படைவீரர்களிடம் நீங்கள் எவரையும் அச்சுறுத்திப் பணம் பறிக்காதீர்கள்; யார்மீதும் பொய்க்குற்றம் சுமத்தாதீர்கள்; உங்கள் ஊதியமே போதும் என்றிருங்கள் என்றார். தன் மனைவியை விலக்கிவிட்டு ஒன்றுவிட்ட சகோதரனின் மனைவி ஏரோதியாவை மணந்த ஏரோதைக் கண்டித்தபோது ஏரோது யோவானை கொலை செய்தார்.

புனித ஜோசப் கஃபாசோ

    

    புனித ஜோசப் கஃபாசோ இத்தாலியில் 1811ஆம் ஆண்டு ஜனவரி 15ஆம் நாள் பிறந்தார். பிறவிலேயே முதுகுத்தண்டு பிரச்சனையோடு பிறந்தார். அன்னை மரியாவிடம் மிகுந்த அன்பும் பக்தியும் கொண்டிருந்தார். ஒறுத்தல் முயற்சிகள் வழியாக இறையாசீர் பெற்றார். தவறாமல் திருப்பலியில் பங்கேற்று பலிபீடத்தில் உதவினார். ஏழை குழந்தைகளுக்கு மறைக்கல்வி கற்றுக்கொடுத்தார். ஒழுக்கமுள்ளவராகவும் தூயவராகவும் வாழ்ந்த ஜோசப் 22ஆம் வயதில் குருவானார். 

    தூரின் நகரில் குருமடத்தில் அறநெறி ஆசிரியராகவும் அதிபராகவும் பணி செய்தார். நற்கருணை பக்திக்கு முதலிடம் கொடுத்தார். ஒப்புரவு அருட்சாதனம் வழி இறை மன்னிப்பை மக்களுக்கு அனுபவமாக்கினார். ஆன்ம ஆலோசகராகவும் சமூக நலனில் அக்கறை உள்ளவராகவும் இருந்தார். ஏழைகள் ஆதரவற்றோருக்கு ஆதரவு அளித்தார். தானம், தவம், ஒறுத்தல் வழி இறைவனை மாட்சிப்படுத்திய ஜோசப் 1860ஆம் ஆண்டு ஜøன் 23ஆம் நாள் இறந்தார்.  

புனித ரோமுவால்ட்

         

         புனித ரோமுவால்ட் இத்தாலி நாட்டில் 950ஆம் ஆண்டு செல்வந்தக் குடும்பத்தில் பிறந்து ஆடம்பரமாக வாழ்ந்தார். தனது தந்தையின் தவறுகளுக்கு பரிகாரம் செய்தார். புனித ஆசிர்வாதப்பர் துறவு இல்லத்தில் சேர்ந்தார். கடுமையான விதிமுறைகள் பின்பற்றி தன்னை நெறிப்படுத்தினார். கடுந்தவத்துடன் கூடிய செப வாழ்வுக்கு தன்னை அர்ப்பணித்தார். தவமேற்கொண்ட ரோமுவால்ட், மரினுஸ் இருவரும் இணைந்து புதிய துறவு இல்லம் நிறுவினர். 

           இத்தாலி முழுவதும் சுற்றித் திரிந்து நற்செய்தி போதித்து பல்வேறு துறவு இல்லங்கள் நிறுவினார். சென்ற இடமெல்லாம் துறவு இல்லம் நிறுவினார். இறைவார்த்தை வாழ்வாக்கி ஆன்மாவின் உணவாகவும், வாழ்வின் சட்டமாக கொண்டு பயணித்தார். இறைவேண்டலில் நிலைத்திருந்து இடைவிடாமல் இறைவனுக்கு நன்றிகூறி இறையாட்சி பணி செய்த ரோமுவால்ட் 1072ஆம் ஆண்டு ஜøன் 19ஆம் நாள் இறந்தார்.

புனித மாற்கு மற்றும் மார்செலியன்

   

    புனித மாற்கு மற்றும் மார்செலியன் உரோமையில் பிறந்தார்கள். கிறிஸ்தவர்கள் என்ற காரணத்தால் 10வது மறைகலத்தின் போது டயோக்ளிசின் அரசர் அவர்களை கைது செய்து சிறையில் அடைத்தார். இவருடைய பெற்றோர்,  “கிறிஸ்துவை மறுதலித்து உரோமை தெய்வங்களை வணங்கி தங்கள் உயிரைக் காத்துக்கொள்ளுமாறு” கூறியபோது இருவரும் மறுத்தனர். 

    மாற்கு, மார்செலியன் இருவரும் நீதிபதியின் முன் நிறுத்தப்பட்டனர். உரோமை தெய்வத்திற்கு வணக்கம் செலுத்துமாறு நீதிபதி கட்டளையிட்டார். உரோமை தெய்வத்தை வணங்காமல் கிறிஸ்துவை அரசராக அறிக்கையிட்டபோது மரண தண்டனை விதித்து 286ஆம் ஆண்டு ஜøன் 18ஆம் நாள் கொலை செய்தனர்.

புனித கிரகோரி பார்பரீகோ

  

    புனித கிரகோரி பார்பரீகோ இத்தாலியில் 1625ஆம் ஆண்டு செப்டம்பர் 16ஆம் நாள் பிறந்தார். திருச்சபை சட்டம், உள்நாட்டு சட்டம் ஆகியவற்றில் முனைவர் பட்டம் பெற்றார். 1655ஆம் ஆண்டு குருவானார். இரக்கச் செயல்கள் வழி இறையன்பை வெளிப்படுத்தினார். 1656ஆம் ஆண்டு உரோமையில் பிளேக் நோய் பாதித்த நோயாளின் ஆன்மீகம், பொருளாதார தேவைகளை நிறைவேற்றினார். 

    1657 இல் ஜூலை 9 ஆம் நாள் பெர்காமோ மறைமாவட்டவத்தின் ஆயரானார். 1660ஆம் ஆண்டு ஏப்ரல் 5ஆம் நாள் கர்தினாலானார். நூலகங்கள் நிறுவி கல்வி பணிக்கு முன்னுரிமை கொடுத்தார். திருதெந்து பொதுச்சங்கத்தின் முடிவுகளை நிறைவேற்றினார். கிறிஸ்தவ ஒன்றிப்பிற்கு முக்கியத்துவம் கொடுத்தார். மேய்ப்புப்பணி சந்திப்பு மையங்கள் தொடங்கினார். இறைபணிகளை ஆர்வமுடன் செய்த கிரகோரி 1697ஆம் ஆண்டு ஜூன் 18ஆம் நாள் இறந்தார்.

புனித யோவான் பிரான்சிஸ் ரெஜிஸ்

  

    புனித யோவான் பிரான்சிஸ் ரெஜிஸ் பிரான்ஸில் 1597 இல் ஜனவரி 31ஆம் நாள் பிறந்தார். 1616ஆம் ஆண்டு இயேசு சபையில் சேர்ந்தார். திருச்சபையின் நம்பிக்கையின் போதனைகளை கற்பிக்கவும், ஆன்மாக்களை மீட்கவும் அயராது உழைத்தார். 1630ஆம் ஆண்டு குருவாகி இறையாட்சி பணியை ஆரம்பித்தார். தூலூஸ் நகரம் பிளேக் நோய் பரவியபோது மக்களை காப்பாற்ற உழைத்தார். 

 மருத்துவமனையில் நோயாளிகளை சந்தித்து ஆறுதல்கூறி செபித்தார். இரக்கச் செயல்கள் வழி மக்களின் தேவைகளை நிறைவேற்றினார். வசதியானவர்களிடம் உதவி பெற்று ஏழைகளின் துயர் போக்கினார். பாலியல் தொழில் வழி நிம்மதியை இழந்தவர்களின் மறுவாழ்வுக்கு ஏற்பாடு செய்தார். 50க்கும் மேற்பட்ட மாவட்டங்களில் நற்செய்தி அறிவித்து பலரை மனம்மாறினர். பல்வேறு துன்பங்களுக்கு மத்தியில் நற்செய்தி அறிவித்த யோவான் 1640ஆம் ஆண்டு டிசம்பர் 30ஆம் நாள் இறந்தார்.

புனித ஜெர்மேன் குசேன் பிப்ராக்

 

புனித ஜெர்மேன் பிரான்ஸில் 1579ஆம் ஆண்டு பிறந்தார். கழுத்து, தாடை காசநோய்க் கட்டியால் துன்புற்றார். தாயை இழந்தபோது தந்தை மறுமணம் செய்தார். சிற்றன்னை,  ஜெர்மேனின் நோய் தன்னை பாதிக்கும் என்று பயந்து வீட்டிலிருந்து வெளியேற்றினார். ஜெர்மேன் மாட்டுத்தொழுவத்தில் இலை சருகுகளை மெத்தையாக்கி உறங்கினார். காய்ந்த ரொட்டித் துண்டுகள் உண்டு அமைதியாக வாழ்ந்தார்.

     திருப்பலியில் தவறாமல் பங்கேற்றார். மறைக்கல்வி, கத்தோலிக்க விசுவாசம் பயின்றார். ஆடுகள் மேய்கும்போது செபமாலை செபித்தார். உடல்நோய், ஆதரவற்ற நிலையை தன்னொடுக்க தவமுயற்சி வழி ஆசீர்வாதமாக மாற்றினார். நற்கருணைமீதும் அன்னை  மரியாவின்மீதும் ஈடு இணையற்ற அன்பும், பக்தியும் கொண்டிருந்தார். எளிமையிலும், இகழ்ச்சியிலும், வறுமையிலும் இறைகரம் பற்றி வாழ்ந்த ஜொóமேன் 1061ஆம் ஆண்டு ஜூன் திங்கள் 15ஆம் நாள் இறந்தார்.

புனித மெத்தோடியஸ்

    

       புனித மெத்தோடியஸ் 788இல் சிசிலியில் பிறந்தார். கல்வி அறிவில் வளர்ந்தபோது வேலை வாய்ப்புகள் தேடிவந்தன. ஆடம்பர வாழ்வை துறந்து பித்தினியாவில் துறவு மடத்தில் சேர்ந்தார். இறையனுபவம் பெற்று இறைதிட்டம் நிறைவேற்றினார். அர்மீனியனான 5ஆம் லியோ அரசன் சுரூப வழிபாட்டில் ஈடுபடும் கிறிஸ்தவர்களை கென்றான்.

     மெத்தோடியஸ் திருத்தந்தை முதலாம் பாஸ்காவை சந்தித்து இந்நிலையை எடுத்துரைத்து தன்னால் இயன்றவரை முயற்சி செய்தார். மிக்கேல் அரசர் ஆட்சி செய்த சிலநாட்களில் கிறிஸ்தவர்களுக்கு எதிராக செயல்பட்டார். மெத்தோடியûஸ கைது செய்து அக்ரிதா தீவில் சிறையில் வைத்தான். 3ஆம் மிக்கேலின் தாயின் ஆட்சியில் மெத்தோடியஸ் விடுதலையானார். 842 இல் மெத்தோடியஸ் தலைமையில் ஆயர் மன்றம்கூடி சுரூப வழிபாட்டை அங்கீகத்தது. மெத்தோடியஸ் 847, ஜூன் 14ஆம் நாள் இறந்தார்.  

புனித பதுவை அந்தோணியார்

    

    நற்செய்தியின் இறைமனிதர்; உலகின் மாபெரும் புனிதர்; திருச்சபையின் மறைவல்லுநர்; காலத்தின் அறிகுறிகளைத் தெரிந்து திருமறையைப் பாதுகாத்த இறைவாக்கினர். நற்செய்தியைச் சொல்லாலும்; செயலாலும்; வாழ்வாலும் அறிவித்த இறைதூதர். ஏராளமான அற்புதங்கள் செய்தவர். திருச்சபையின் மாணிக்கமாய்த் திகழ்ந்தவரே புனித அந்தோணியார். போர்ச்சுக்கலில் 1195இல் ஆகஸ்டு 15ஆம் நாள் பிறந்தார். லிஸ்பன் மறைமாவட்ட பாடசாலையில் கல்வி கற்று படிப்பிலும், ஒழுக்கத்திலும், நுண்ணறிவிலும் இறைபற்றிலும், ஞானத்திலும் வளர்ந்தார். திருப்பலியில் பங்கேற்று இறைவனைப் போற்றுவதிலும், திருப்பாடல்கள் பாடுவதிலும், செபிப்பதிலும் ஆர்வம் செலுத்தினாந்தார். பெரும்மகிழ்வுடன் பீடசிறுவனாக பணிபுரிந்தார். 

  ஒருமுறை நற்கருணைமுன் முழந்தாள்படியிட்டு செபித்துக் கொண்டிருந்தார். அவர் முன்பாக  அலகை தோன்றி அவரைச் சோதிக்க முயன்றது. கலக்கம் ஏற்பட்டாலும் முழந்தாள்படியிட்டிருந்த சலவைக் கல்லில் பக்தியுடன் சிலுவை அடையாளம் வரைந்தார். அந்தச் சிலுவை அடையாளம் சலவைக் கல்லில் அப்படியே பதிந்துவிட்டது. இதைப் பார்த்ததும் அலகை அலறி அடித்துக்கொண்டு ஓடியது. அந்த சலவைக் கல் சிலுவை அடையாளத்துடன் இன்றும் காணப்படுகிறது. இவ்வாறு சிலுவையின் மகத்துவத்தைத் தமது  பன்னிரெண்டாம் வயதில் உணர்ந்து கொண்டார். இந்நிகழ்ச்சி வழியாகக் குருவானவராகப் பணியாற்ற விரும்பினார்.

       தூய அகுஸ்தினார் குருமடத்தில் சேர்ந்து 1219ஆம் ஆண்டு குருவானார். 1220ஆம் ஆண்டு பிரான்சிஸ்கன் துறவு சபையில் சேர்ந்தார். அசிசியாரின் தாழ்ச்சி, ஏழ்மை, ஆன்மதாகம், கீழ்ப்படிதலைப் பின்பற்றினார். இதயத்தில் தாழ்ச்சிக்கு இடமளித்து இறையருள் பெற்று இறைமக்களின் நலன் முன்னிட்டு புதுமைகள் செய்தார். திருச்சபையின் மறைவல்லுநர்; திருமறையைப் பாதுகாத்து நற்செய்தியை சொல்லாலும்; செயலாலும்; வாழ்வாலும் அறிவித்து 1231ஆம் ஆண்டு ஜூன் 13ஆம் நாள் இறந்தார்.

ஸகாகுன்நகர் புனித யோவான்

     ஸகாகுன் நகர் புனித யோவான் ஸ்பெயினில் 1419ஆம் ஆண்டு பிறந்தார். புனித ஆசிர்வாதப்பர் துறவு மடத்தில் தொடக்கக்கல்வி கற்று இறையன்பில் வளர்ந்தார். பர்கோஸ் நகர் ஆயரின் கண்காணிப்பில் உயர்கல்வி கற்று இறையாட்சி பணியில் ஆர்வம் கொண்டார். சலமான்கா பல்கலைக்கழகத்தில் 4 ஆண்டுகள் இறையியல் பயின்றார். உலக இன்பங்களை துறந்து 1445 இல் குருவானார். 

கிறிஸ்துவை அறியாத மக்களுக்கு நற்செய்தியை அறிவித்து ஆன்மாக்களை மீட்டார். ஒறுத்தல், தன்னொடுக்கம், ஏழ்மையை கடைப்பிடித்து ஏழைகளுக்கு பணி செய்தார். நோயாளிகளை சந்தித்து ஆறுதல்கூறி நலமாக்கினார். 1464இல் புனித அகுஸ்தினாரின் துறவு மடத்தில் துறவியாக வாழ்ந்தார். அயலானின் உள்ளுணர்வுகளை அறிந்த நற்செய்தி வழி பாவிகளை மனந்திரும்பினார். சமூகத்தில் மக்களை துன்புறுத்தியவர்களை கண்டித்தபோது பொறாமை கொண்ட சமூக விரோதிகள் உணவில் விஷம் கலந்து கொடுத்தபோது 1479ஆம் ஆண்டு இறந்தார்.

புனித பர்னபா

 

    புனித பர்னபா இளமையில் கிறிஸ்துவரானார். தனது நிலத்தை ஏழைகளுக்கு பகர்ந்தளித்தார். தூய ஆவியால் நிறைந்து நம்பிக்கை வாழ்வில் வளர்ச்சி அடைந்தார். பவுல் மனம் மாறியவுடன் பர்னபாதான் அவரை எருசலேமில் இருந்த திருத்தூதர்களிடம் அழைத்து சென்று அறிமுகம் செய்தார். அந்தியோக் நகரில் திருத்தூது பணியால் மனம்மாறி கிறிஸ்தவர்களை நம்பிக்கை வாழ்வில் நிலைத்திருக்க உறுதிப்படுத்தினார். 

    லிஸ்திராவில் ஊனமுள்ள ஒருவரை நடக்க செய்தார். நற்செய்தியாளர் மாற்கு, பவுல், பர்னபா மூவரும் இணைந்து சைப்பிரஸில் போதித்தனர். எருசலேமில் நடந்த முதல் பொதுச்சங்கத்தில் பங்கேற்றார். பன்னிரு திருத்தூதர்களுள் ஒருவராக இல்லாதபோதும் பவுலைப் போலவே பர்னபாவும் திருத்தூதர் என்றே அறியப்படுகிறார். சைப்பிரஸில் நற்செய்தி அறிவித்தபோது கல்லால் எறியப்பட்டு 64ஆம் ஆண்டு இறந்தார். 

புனித கெட்டூலியஸ்

    

    புனித கெட்டூலியஸ் இத்தாலியில் பிறந்தார். டிராஜன் பேரரசன் ஆட்சியில் கெட்டூலியஸ் அதிகாரியாக பணி செய்தார். கிறிஸ்துவை அரசராகவும் அன்பராகவும் நண்பராகவும் ஏற்று திருமுழுக்குப் பெற்றார். தனது அதிகாரப் பெறுப்பை துறந்து இல்லம் சென்றார். இதையறிந்த டிராஜன் கெட்டூலியûஸ கைது செய்ய வீரர்களை அனுப்பினான். 

    தன்னை கைது செய்ய வந்த வீரர்களிடம் கிறிஸ்துவின் அன்பு, நம்மை மீட்க அவர் ஏற்ற துன்பங்களை எடுத்துரைத்தபோது வீரரர்கள் மனம்மாறி திருமுழுக்கு பெற்றனர். பேரரசன் கிறிஸ்தவர்களை ஏற்றுக்கொண்ட வீரர்களை கிறிஸ்துவை மறுதலிக்க கூறினான். இதைமறுத்த கெட்டூலியஸ் மற்றும் வீரர்களை 27 நாட்கள் சிறைவைத்து துன்புறுத்தி நெருப்பில் தூக்கிப்பேட்டபோது தீ அவர்களை ஒன்றும் செய்யவில்லை. 120இல் கெட்டூலியஸ் சிம்ஃபோரோசா தம்பதியரின் 7 மகன்களும் வீரர்களின் தலையையும் துண்டித்தான்.

 

புனித எஃப்ரேம்

        

புனித எஃப்ரேம் சிரியா நிசிபிஸ் நகரில் 306ஆம் ஆண்டு பிறந்தார். நிசிபிஸ் நகர ஆயரிடம் கல்வி கற்று நற்பண்பில் வளர்ந்தார். இளம்பருவத்தில் திருமுழுக்குப் பெற்று திருத்தொண்டரானார். கிறிஸ்தவர்களுக்கு ஆதராவு அளித்த உரோமை பேரரசர் முதலாம் கான்ஸ்டன் மறைவுக்குப் பின் பெர்சிய அரசன் இரண்டாம் ஷாபர் நிசிபிஸ் நகரை முற்றுகையிட்டபோது எஃப்ரேம் இறைவேண்டல் வழி ஆயரை காப்பாற்றினார். 

      எஃப்ரேம் இறைவன் செய்த புதுமைகளுக்கு பாடல்கள் மூலம் நன்றி கூறினார். 364இல் நாட்டை விட்டு வெறியேறி 364இல் எதேசா மலைக்கு சென்றார். 372 எதேசாவில் பெரும் பஞ்சம் ஏற்பட்டபோது பசியால் வாடியவர்களுக்கு பிச்சை எடுத்து அவர்களின் பசி போக்கினார். தப்பரைகளுக்கு எதிராக குரல் கொடுத்தார். மரியாவின் அன்பு மகனாக வாழ்ந்தார். புகழ்மிக்க ஆசிரியர், கவிஞர், மறையுரையாளர், நம்பிக்கையின் காவலர், தூய ஆவியின் புல்லாங்குழல் என்று அழைக்கப்பட்ட எஃப்ரேம் 373, ஜூன் 9ஆம் நாள் இறந்தார்.

                                                 🌷🌷🌷🌷🌷🌷🌷

புனித மரியம் தெரசியா

  புனித மரியம் தெரசியா கேரளாவில் 1876, ஏப்ரல் 26ஆம் நாள் பிறந்தார். கிறிஸ்துவுக்கு தனது கற்பை அர்ப்பணித்தார். தாயன்பை அன்னை மரியாவிடம் பெற்றார். ஏழ்மையில் இறைவனின் கரம்பற்றி நடந்தார். கடவுளின் இரக்கத்தையும் அன்பையையும் தமது நற்செயல்கள் வழியாக வெளிப்படுத்தினார். எண்ணற்ற மக்கள் கிறிஸ்துவை அரசராக ஏற்றுக்கொள்ள தனது வாழ்வை அர்ப்பணித்தார். நோன்பிருந்து இறைவனிடம் மன்றாடினார். சமூகத்தில் நன்மைகள் வழி ஏழைகளுக்கு உதவினார். தன்னுடன் 3 பெண்களை சேர்த்து அன்பு பணிகள் மூலம் நற்செய்தி அறிவித்தார். 

      இறைபணி செய்ய பிரான்சிஸ்கன் சபையில் சேர்ந்தார். ஒறுத்தல்கள் வழி இறைவனுக்கு உகந்தவாறு வாழ்ந்தார். கிறிஸ்துவின் 5 காயங்கள் தனது உடலில் ஏற்று கிறிஸ்துவின் துன்பத்தில் பங்கு சேர்ந்தார். இறைகாட்சிகள் காணும்வரம் பெற்றார். பாவிகள் மனந்திரும்ப நோன்பிருந்து ஒறுத்தல் செய்தார். குணமாக்கும் வரம் பெற்றபோது நோயாளிகளை குணமாக்கினார். நற்கருணை முன் கண்விழித்து செபித்தார். 

    கிறிஸ்துவின் அன்பை பெற்றுக்கொள்ள நற்கருணை முன் செபித்தார். துன்பங்களை துணிவுடன் ஏற்றுக்கொண்டார். பேராயர் மார் யோவான் மெனாகரி இவரின் அனுமதியும் ஆசீரும் பெற்று 1903ஆம் ஆண்டு தன்னுடன் மூன்று சகோதரிகளை இணைத்து பிரான்சிஸ்கன் சபைப் பிரிவில் சேர்ந்து துறவற இல்லம் ஆரம்பித்தார். 1914, மே 14ஆம் நாள் திருக்குடும்ப துறவு சபை தொடங்கிய தெரசியா 1926, ஜூன் 8ஆம் நாள் இறந்தார்.

🌷புனித தாமஸ் ஏ கெம்பிஸ்🌷

         புனித தாமஸ் ஏ கெம்பிஸ் ஜெர்மனியில் 1379ஆம் ஆண்டு பிறந்தார். 13ஆம் வயதில் பொதுவாழ்வு சகேதரர்களின் அமைப்பில் சேர்ந்து அறிவிலும் ஞானத்திலும் வளர்ந்தார். 19ஆம் வயதில் புனித அகுஸ்தினார் துறவு மடத்தில் சேர்ந்து 1413இல் குருவானார். 

     சில ஆண்டுகளில் மடத்தின் துணைத்தலைவரானார். பதவிகள் தன்னை தேடி வந்தபோது பணிவுடன் மறுத்தார். துறவு இல்லத்திலிருந்து வெளியேறாமல் 70 ஆண்டுகள் இறைவனோடு ஒன்றிணைந்து இறைபிரசன்னத்தில் வாழ்ந்தார். எழுத்துப்பணிகள் வழியாக இறைமாண்பை எடுத்துதுரைத்தார். 

    தனது இறையனுபவங்களை, இறைவனின் கருணையை நூல்கள் வழியாக வெளிப்படுத்தினார். இறையியல் நிறைந்த போதனைகள், கட்டுரைகள், காலத்திற்கும் அழியாத புகழ் பெற்ற கிறிஸ்து நாதர் அனுசாரம் என்ற நூல் எழுதினார். துறவிகளிடத்தில் அன்பு கொண்டு வாழ்ந்த தாமஸ்1471ஆம் ஆண்டு ஜூலை 25ஆம் நாள் இறந்தார்.

                                                                    🌷🌷🌷🌷🌷🌷🌷

புனித நார்பர்ட்

    புனித நார்பர்ட் 1080ஆம் ஆண்டு அரச குடும்பத்தில் பிறந்தார். தனக்கு கிடைத்த வாய்ப்புகளை பயன்படுத்தி அறிவிலும் ஞானத்திலும் வளர்ந்தார். துணை திருத்தொண்டராக ஸான்டனில் பணி செய்தார். ஃபிரடரிக் அரண்மனையில் எளிமையாக வாழ்ந்தார். ஒருமுறை குதிரையில் பயணம் செய்தார். தீடீரென இடி, மின்னல் ஏற்பட்டது. குதிரை நார்பர்டை கீழே தள்ளிவிட்டு ஓடியது. அயலானின் உதவியுடம் எழுந்து இறைவேண்டல் செய்து இறைவனின் திருவுளம் அறிந்தார். அரசவை வாழ்வை துறந்து ஒறுத்தல் செய்ய சீர்பெர்க் துறவுமட தலைவருடன் சேர்ந்தார். 35ஆம் வயதில் குருவானார். 

       கிறிஸ்து இயேசுவிடம் இணைந்து இறைபற்றுடன் வாழ தனது உடமைகளை ஏழைகளுக்கு கொடுத்தார். வெறுங்காலுடன் நடந்தார். பிச்சை எடுத்து உண்டார். லானில் வனப்பகுதியில் துறவு இல்லம் அமைத்து தவம் செய்தார். மக்கள் ஆன்மீக வாழ்வில் வளர அயராது உழைத்தார். தனது பணிகளை திருத்தந்தை இரண்டாம் ஜெலாசியுஸ் அவர்களிடம் எடுத்துரைத்து இறையாசி பெற்றார். லான் வனப்பகுதயில் துறவு இல்லம் அமைத்து ஒறுத்தல் செய்து இறைவனை மாட்சிப்படுத்தினார். 

        பண ஆசையும், தன்னலமும் துறந்து தூய உள்ளத்துடன் அன்பின் வழியில் கிறிஸ்துவின் விழுமியங்களுக்கு சான்று பகர்ந்தார். உரோமை சென்று வரும் வழியில் பார்வையற்ற பெண்ணுக்கு பார்வை அளித்தார். இறைவனின் திருவுளம் நிறைவேற்றிய நார்பட் ஆயரானார். திருச்சபை சொத்துக்களை அபகரித்தவர்களிடம் சொத்துக்களை திரும்ப கொடுக்க கூறினார். இறைவனோடு இணைந்து இறைமாட்சிக்காக பணி செய்த நார்பர்ட் 1134ஆம் ஆண்டு ஜூன் 6ஆம் நாள் இறந்தார்.

🌷🌷🌷🌷🌷

புனித போனிஃபஸ்

 

       புனித போனிஃபஸ் கிரெட்டன் நகரில் சமூகத்தில் மதிப்பும் செல்வாக்கும் பெற்ற குடும்பத்தில் பிறந்தார். அறிவிலும் ஞானத்திலும் நல்லொழுக்கத்திலும் வளர்ந்தார். வசதியாக வாழ்ந்தபோது நிலையான இறைவனை தனதாக்க துறவு மேற்கொள்ள விரும்பினார். மிகுந்த போராட்டத்திற்கு பிறகு தந்தையின் அனுமதி பெற்று ஆசிர்வாதப்பர் துறவு மடத்தில் சேர்ந்து 30ஆம் வயதில் குருவானார். 

    திருத்தந்தையின் அழைப்பு பெற்று துரிங்கியர் மத்தியில் பணியாற்றினார். பின் பிரிசியரில் வில்லி பிரார்ட்டுடன் இணைந்து எண்ணற்றோரை திருமறையில் சேர்த்தார். போனிஃபஸின் கடின உழைப்பும், அதன் பயனையும் அறிந்த திருத்தந்தை உரோமைக்கு அழைத்து 722ஆம் ஆண்டு நவம்பர் 30ஆம் நாள் ஆயராக அருள்பொழிவு செய்து ஜெர்மனியில் மறைபணி செய்யும் பொறுப்பை ஒப்படைத்தார். 

    737இல் ஆஸ்திரேலிய நாட்டு பிரதிநிதியானார். இறைவார்த்தையை வாழ்வாக்கி ஏழைகளின் உரிமைக்கு குரல் கொடுத்தார். 753ஆம் ஆண்டு யூடிரெச்ட் பகுதியில் ஏராளமானோருக்கு திருமுழுக்கு கொடுத்தார். இதனால் உள்ளூர் மதவாதிகள் தங்கள் மதம் அழிந்துவிடுமோ என்று அஞ்சி, தூயவரும் அன்பருமான போனிஃபஸ் மற்றும் அவருடன் 52 பேரையும் தலையை வெட்டி கொலை செய்தனர்.

புனித பிரான்சிஸ் கராச்சியோலா

       புனித பிரான்சிஸ் கராச்சியோலா இத்தாலி நாட்டில் 1563ஆம் ஆண்டு அக்டோபர் 13ஆம் நாள் பிறந்தார். அன்பும் நேர்மையும் ஒழுக்கமும் மிகுந்தவராக வளர்ந்தார். 22ஆம் வயதில் தொழுநோய் பாதித்தபோது இறைவேண்டல் வழியாக நலமடைந்தார். தனது சொத்துக்களை விற்று ஏழைகளுக்கு கொடுத்தார். 1587ஆம் ஆண்டு குருவானார். 

 தண்டனை கைதிகள் மத்தியில் நற்செய்தி அறிவித்தார். கைதிகள் மனந்திரும்பி கிறிஸ்துவை அரசராகவும் மீட்பராகவும் ஏற்றனர். ஏழைகளையும் ஆதரவற்றோரையும் அதிகம் அன்பு செய்தார். புதிய சபையை உருவாக்கினார். பதவிகளை விரும்பாமல் பணிவுடன் தன்னொடுக்க முயற்சிகள் மேற்கொண்டார். 24 மணிநேர நற்கருணை ஆராதனையில் மக்களை பங்கேற்க செய்தார். 

    

    ஆயர் பதவியும், சபையின் தலைமை பொறுப்பும் தன்னிடம் வந்தபோது தாழ்ச்சியுடன் துறந்தார். காட்சி தியானம் வழியாக இறையனுபவம் பெற்று சபை  உறுப்பினர்களை இறைவழி நடத்தினார். எல்லா பிரச்சனைகளையும்  நற்கருணை ஆண்டவரிடம் அர்ப்பணித்து இறையருள் பெற்று முன்னேறினார். அன்னை மரியாவின் அன்பும் அருளும் அரவணைப்பும் செபமாலை வழியாக பெற்றுக்கொண்ட பிரான்சிஸ் 1608ஆம் ஆண்டு இறந்தார்.  

உகாண்டா மறைசாட்சிகள்

 

உகாண்டாவில் கிறிஸ்துவின் அரசாட்சி நிலவிட ஏராளம் மறைபணியாளர்கள் தங்களை அர்ப்பணித்தனர். 1884, முத்தேசா என்பவர் ஆட்சி செய்தார். தனது நாட்டில் வசித்த அராபியர்கள், கத்தோலிக்க கிறிஸ்தவர்கள், ஆங்கிலிக்கன் கிறிஸ்தவர்கள் அனைவருடனும் அரசன் நல்லுறவு கொண்டிருந்தார். முத்தேசா  இறந்தப்பின் இளவரசர் வாங்கா அரசரானார். தனது ஆட்சி பகுதியிலுள்ள மறைபணியாளர்களை வதைத்தார். ஒராண்டுக்குள் ஜோசப் ருகாராமா, மார்க் ககும்பா மற்றும் நோவா சர்வாங்கா ஆகிய 3 கிறிஸ்தவ பணியாளர்கள் மறைசாட்சிகளாக இறந்தனர். ஆங்கிலிகன் ஆயர் ஜேம்ஸ் ஹன்னிங்டன் என்பவரையும் கொலை செய்தனர். கிறிஸ்துவின் பொருட்டு எண்ணற்ற பணியாளர்கள் கொலையுண்டனர். 1886, ஜøன் 3ஆம் நாள் 26 பேர் மறைசாட்சியாக இறந்தனர். 45 பேருக்கு மேல் கிறிஸ்துவை அரசராக ஏற்றதால் இரத்தம் சிந்தி இறந்தனர்.